ထိုင်းမြန်မာနယ်စပ်၊ ဘုရားသုံးဆူဒေသတွင် ထိုင်းနှင့်မြန်မာတို့ နယ်မြေပိုင်းခြားခြင်းနှင့်ပတ်သက်ပြီး ညှိနှိုင်းမှုမရသောကြောင့် လူဝင်ထွက်ဖြတ်သန်းဂိတ်ကို ပိတ်ထားကြောင်း သိရှိရပါသည်။
ယမန်နေ့ မွန်းလွဲ(၂)နာရီခန့်တွင် ဘုရားသုံးဆူဒေသရှိ ခလရ(၃၂) တပ်ရင်းမှူး ဒုတိယဗိုလ်မှူးကြီး အောင်တင့်ခိုင်အမိန့်ဖြင့် ပိတ်ခဲ့ခြင်းဖြစ်သည်။
“ ဘုရားသုံးဆူအနီးမှာရှိတဲ့ မြေကွက်တစ်ခုကို နအဖတို့ ပန်းခြံလုပ်ဖို့ရှိတယ်၊ ပြီးတော့ ရှမ်းကုန်းစာသင်ကျောင်းအနောက်နဲ့ ဂေါက်ကွင်းအကြား၊ နအဖတို့လမ်းဖောက်နေတာကို ထိုင်းအာဏာပိုင်တို့ လာတားတဲ့အတွက် လမ်းပိတ်လိုက်တယ်” ဟု ဘုရားသုံဆူဒေသမှ မြန်မာစစ်အာဏာပိုင်နှင့်နီးစပ်သူတစ်ဦးက ကောင်းဝါသတင်းဌါနသို့ ပြောပြသွားပါသည်။
ကြံတောရွာသားတစ်ဦးက “ ဂျပန်ရေတွင်းနဲ့ ဘုရားသုံးဆူလမ်းပေါ်မှာရှိတဲ့ စစ်ဆေးဂိတ်ကနေ သွားလာတဲ့သူတွေကို မပေးသွားဘူး၊ နအဖတို့က လက်နက်အပြည့်အစုံနဲ့ လမ်းသစ်ဖောက်လုပ်ရေးမှာ ရော၊ လူဝင်လူထွက်အပေါက်အားလုံးကို စောင့်ကြည့်နေတယ် ” ဟု ဆိုပါသည်။
“ ကျွန်တော်တို့ ညဘက်အချိန်ပိုအလုပ်လုပ်လို့မရတော့ဘူး၊ မနက်ဖြန်လည်း အလုပ်ဆင်းလို့မရ ဘူး၊ အလုပ်ရှင်တို့ကအလုပ်ရုံပိတ်ပစ်မယ်လို့ပြောတယ် နောက်အလုပ်သမားတွေအလုပ်မဆင်းရ သည့်အတွက်အလုပ်ရှင်ဘက်ကလည်း ပစ္စည်းများအချိန်မီထုတ်လုပ်တင်ပို့ရန်အခက်အခဲကြုံတွေ့ နေရ ပါတယ် ” ဟု ဖိနပ်စက်ရုံမှအလုပ်သမားတစ်ဦးကပြောပါသည်။
ဘုရားသုံးဆူနယ်စပ်ဒေသဖြတ်ကျော်ခွင့်ကို ယခင်က နှစ်နိုင်ငံသဘောတူညီချက်အရ တရားဝင်ဖွင့်လှစ်ခဲ့သော်လည်း (၂၀၀၇) မတ်လတွင် စံခရပူရီမြို့နယ်ရှိ လိုင်ဝေဒေသ၌ DKBA ကရင်လက်နက်ကိုင်တပ်ဖွဲ့က ထိုင်းနယ်ခြားစောင့်တပ်ပုလိပ်နှစ်ဦး ကို ဖမ်းဆီးခဲ့သောကြာင့် နယ်စပ်အားလုံးကို ထိုင်းတို့ဘက်မှ ပိတ်ပစ် လိုက်ပါသည်။
တဖန် အဆိုပါ ထိုင်းပုလိပ်နှစ်ဦးကို ပြန်လွှတ်လိုက်ချိန်၌ အခြားနယ်စပ်ဒေသကို ပြန်ဖွင့်ပေးသော်လည်း ဘုရားသုံးဆူဒေသ နယ်စပ်ဖြတ်ကျော်သည့်ပင်မဂိတ်ကြီးကိုမူ မြန်မာအာဏာပိုင်တို့ ယခုတိုင်ဆက်ပိတ်ထားဆဲဖြစ်သည်။
No comments:
Post a Comment